Mr. Vertigo, de Paul Auster (en galego)

O protagonista de Mr. Vertigo é Walter Claireborne Rawley, un pillabán orfo de pai e nai que ten nove anos ó comezo da novela. Walt vagabundea e anda á esmola ata que un vello xudeu e sabio, o mestre Yehudi, o atopa nunha rúa de Saint Louis, Missouri, no ano 1927. O mestre promételle que lle vai ensinar a voar, e que se non o conseguise, Walt terá o dereito de decapitalo cunha machada. A forza do narrado nesta novela, nun escenario marcado primeiro polo ambiente da depresión e a Lei Seca e despois polo aborrecemento posterior á Segunda Guerra Mundial, arrastra o lector introducíndoo nunha narración fascinante e fascinadora que así e todo deixa sitio para a reflexión e dosifica o ritmo, empregando o suspense para dar pulo á lectura e non unicamente como o simple obxectivo dunha narrativa que, coma as fábulas antigas, garda un segredo, un consello que pode axudar a vivir.